Zëvendëskryeministrja dhe ministrja e Drejtësisë së Kosovës, Donika Gërvalla, ka reaguar me ashpërsi ndaj kryeministrit të Shqipërisë, Edi Rama, pas publikimit të një editoriali të përbashkët me presidentin e Serbisë, Aleksandar Vuçiç, në gazetën gjermane Frankfurter Allgemeine Zeitung.
Gërvalla tha se artikulli jep përshtypjen se kryeministri shqiptar ndërhyn për të mbrojtur Vučiçin në momentet e vështira të marrëdhënieve të tij me Bashkimin Europian.
“Herë pas here krijohet ideja që kur Vuçiçi vihet nën presion nga BE-ja dhe Europa, del Edi Rama dhe e nxjerr nga ajo situatë”, deklaroi ministrja.
Ajo theksoi rëndësinë strategjike të Kosovës në çdo marrëdhënie rajonale dhe paralajmëroi se Shqipëria nuk duhet të ndërtojë alternativa bashkëpunimi me Serbinë që anashkalojnë vendin e saj.
“Rruga nga Tirana për në Beograd kalon përmes Prishtinës, jo vetëm gjeografikisht, por edhe ekonomikisht dhe politikisht”, u shpreh ajo.
Gërvalla kritikoi përmbajtjen e editorialit, ku propozohet një integrim i përbashkët i Shqipërisë dhe Serbisë në Bashkimin Europian, pa përmendur qëndrimin e Serbisë ndaj Perëndimit dhe lidhjet e saj me vende si Rusia, Kina dhe Irani. Sipas saj, kjo bie ndesh me orientimin euroatlantik të Shqipërisë dhe Kosovës.
