Deri pak kohë më parë ishte një zv ministër normal në administratë, por që kur u bë ministër i Drejtësisë, Besfort Lamallari duket se nuk i njeh më kufijtë e normales. Në një intervistë në Televizionin Publik Shqiptar, ministri jo vetëm që shpalli fundin e gjykatave për çështje të thjeshta, por ofroi edhe një vizion alternativ ku divorci zgjidhet te noteri dhe mosmarrëveshjet për prona mund të marrin rrugë tek Diella. A thua nuk e ka marrë vesh se drejtuesit e AKSHI-i janë ose në arrest shtëpia vetë ose me rrezikun për të qenë të tillë.
Gjatë intervistës Lamallari bëri të ditur se në muajt në vijim Ministria e Drejtësisë do të prezantojë një platformë të re për zgjidhjen e konflikteve përmes formave alternative, sipas modeleve europiane, pa qenë e nevojshme që qytetarët të shkojnë detyrimisht në gjykatë. Sipas tij, kjo do të ndihmojë edhe në uljen e stokut të dosjeve që zvarriten prej vitesh në sistemin gjyqësor.
Si shembull ilustrues, ministri përmendi rastin e një çifti që kërkon të divorcohet pa pasur implikime financiare apo trashëgimtarë, duke sugjeruar se një proces i tillë mund të zgjidhet fare mirë te noteri, pa humbur kohë, para dhe durim në gjykata.
“Nuk ka arsye që çështje të tilla të zvarriten, kur në vende të tjera zgjidhja e martesës pa elementë financiarë bëhet përmes noterit. Është thjesht shprehje vullneti”, tha Lamallari, duke shtuar se ky ishte vetëm një ilustrim i hapësirave ligjore që, sipas tij, duhet të rishikohen.
Ministri foli gjithashtu për ndërmjetësimin, arbitrazhin, pajtimin dhe madje edhe përdorimin e teknologjisë dhe Inteligjencës Artificiale për zgjidhjen e mosmarrëveshjeve, me synimin që qytetarët të mos shkojnë më fizikisht në gjykata e prokurori as për depozitimin e dokumenteve më të thjeshta.
Në fund, Lamallari theksoi se reforma në drejtësi duhet të matet jo vetëm me paga apo numër ndihmësash ligjorë, por me efektivitet dhe llogaridhënie ndaj qytetarëve. Ndërkohë, nga intervista mbeti e qartë se drejtësia e re që po projektohet nga ministri, më shumë se gjykatë, ngjan me një sportel shërbimesh të shpejta – ku gjithçka zgjidhet, mjafton të mos shqetësosh togën.
