Deputeti Erion Braçe ka zbuluar se shqiptarëve u mungon ndjenja e kursimit, dhe këtë e ka vërejtur tek trafiku i madh pavarësisht çmimeve të larta të karburanteve. Dhe për ta bërë situatën edhe më dramatike, ai kritikon qeverinë se nuk ka ndërmarrë masa për të ndërgjegjësuar qytetarët.
“Nderkohe me kane bere pershtypje dy gjera; E para, po si ka mundesi qe keto dite me cmime te larta nafte, ka me shume levizje dhe me shume trafik?! Na mungon shume nje ndjenje kursimi qe mban larg konsumin tone te perditshem dhe pranojme te paguajme shtrenjte!! E dyta, me dhemb fakti qe ne-MAXHORANCA patem thjeshte vetem dy masa ne kete situate-Bordin dhe Reduktimin me 20% te AKCIZES”, shkruan Braçe.
Të qeshësh a të qash me statusin e Braçes, i cili jo vetëm trafikun e sheh si arsye që qytetarët nuk kursejnë, relativizon me “kritikat” e tij edhe masat e befta të qeverisë sikur kanë sjell lehtësim për qytetarët Bordi i Transparencës dhe akciza!
Por përtej kësaj, duket se Braçe harron një detaj, shumica e qytetarëve nuk lëvizin për qejf, por për punë, shkollë ose hall të përditshëm. Dhe trafiku nuk është reflektim i mungesës së kursimit, por rezultat i rrugëve të ngushta dhe kaosit urban, ku autorët e tij janë shefi i tij si kryeministër dhe kryebashkiak, Edi Rama dhe adashi i tij në qeli, Erion Veliaj.
Prandaj, nëse nuk guxon të kritikojë qartë dhe hapur qeverinë ku bën pjesë se nuk ka marrë masa as sa vendet e rajonit, të paktën të na i kursejë deklaratat qesharake se qytetarët nuk kursejnë.
