Gjykata e Posaçme Kundër Korrupsionit dhe Krimit të Organizuar do të zhvillojë sot dy procese gjyqësore të rëndësishme që lidhen me figura të njohura të politikës shqiptare.
Në orën 11:00 pritet të mbahet seanca e parë e gjyqit në themel ndaj ish-Presidentit të Republikës, Ilir Meta, ish-bashkëshortes së tij Monika Kryemadhi dhe tre të bashkëpandehurve të tjerë. Në këtë proces, Meta dhe Kryemadhi përballen me akuzat për korrupsion, pastrim parash dhe fshehje apo mosdeklarim pasurie.
Ish-presidenti Meta ka bërë të ditur se do të jetë i pranishëm në sallën e gjyqit dhe më herët ka ftuar edhe trupën diplomatike të huaj në Tiranë që të ndjekë seancën, duke deklaruar se gjatë procesit do të çmontojë akuzat e ngritura nga SPAK.
Ndërkohë, në orën 12:00, në të njëjtën gjykatë pritet të zhvillohet edhe seanca për gjyqin në themel ndaj kryebashkiakut të Tiranës, Erion Veliaj, bashkëshortes së tij Ajola Xoxa, si dhe 16 personave të tjerë dhe 12 shoqërive tregtare ose organizatave jofitimprurëse.
Seanca e fundit për këtë çështje është mbajtur më 15 prill, por u shty pasi Drejtoria e Përgjithshme e Burgjeve nuk zbatoi urdhrin e gjykatës për të njoftuar Veliajn. Kryebashkiaku ka kërkuar që seancat gjyqësore të transmetohen drejtpërdrejt për mediat.
