Elisa Spiropali ka reaguar pas shkarkimit nga detyra e Ministres së Jashtme. Në postimin e gjatë në Facebook, Spiropali nuk fsheh zhgënjimin nga surpriza e shkarkimit të saj, që erdhi në të njëjtën ditë me pezullimin e Belinda Ballukut.
Duke qenë se me këtë të fundit është përfolur për rivalitet brenda partisë, dyshimet janë që Spiropali të ketë qenë “kurban” i saj. Për këtë, ish-ministrja e Jashtme nuk ia kursen koleges disa mesazhe në reagim, kur thotë se largimi nga detyra për të është një tërheqje, ndërsa angazhimi do të vazhdojë, duke lënë të kuptohet se Balluku fundin e ka në burg.
“Shqipëria është më e rëndësishme se çdo rol dhe Partia është më e rëndësishme se çdo individ, por dinjiteti personal mbetet themeli mbi të cilin ndërtohet çdo shërbim publik i ndershëm dhe i qëndrueshëm. Në këtë kuptim, për mua përfundimi i një detyre nuk është tërheqje, por vazhdim i angazhimit me të njëjtën bindje dhe të njëjtën përgjegjësi”, shkruan Spiropali.
Ajo më tej bën edhe një krahasim se politika është një “territor ku koha lëviz shpejt, por kujtesa lëviz ngadalë” dhe se rëndësi ka jo posti i mbajtur, por mënyra se si ai është ushtruar dhe pesha e qëndrimeve dhe fjalëve të dhëna. Spiropali nuk harron të përmendë edhe dinjitetin, duke thënë se nuk është dekoratë ceremoniale, por qëndrueshmëri përballë kohës dhe aftësi për të mos u frikësuar as nga e kaluara, as nga e ardhmja.
Ndonëse ai që e quante “Skënderbe” e shkarkoi ende pa u kthyer nga vizita jashtë vendit, ajo nuk harron të falënderojë Ramën për besimin e dhënë ndër vite. Por i kujton kryeministrit që mirënjohjen mos t'ia marrë si nënshtrim personal, por si kulturë politike.
Kujtojmë se në postin e Ministrit të Punëve të Jashtme, kryeministri Edi Rama ka emëruar ish-ambasadorin e Shqipërisë në OKB, Ferit Hoxha.
