Pas mesazheve të koduara të dy javëve të fundit në forumet e Partisë Socialiste, Elisa Spiropali vendosi sot të reagojë më gjatë për debatin që është ngritur rreth qëndrimeve të saj.
Në fakt, aspak surprizë është fakti që Elisa ka stërholluar kaq shumë fjalët sa në disa paragrafë është pothuajse e pamundur të kuptosh qartë se çfarë po thotë. Të gjithë mbetemi me shpresën se të paktën vetë Elisa i ka kuptuar ato që ka shkruar.
Mesazhi në fjalinë e fundit është ndoshta i vetmi nga i cili mund të kuptohet se Elisa ka vendosur të reflektojë. Por jo të flasë hapur për atë që ndodh brenda grupit parlamentar të PS. Të heshtë dhe të stërhollë qëndrimet, dhe jo të thotë troç atë që mendon dhe e mundon. Sepse në PS (dhe në PD), për fat të keq, mendimi dhe fjala e lirë janë shndërruar në një luks që nuk i duhet më askujt.
Vetë Spiropali, në reagimin e saj në Facebook, përdor formulime që tingëllojnë të thella, por që nuk sqarojnë shumë për atë që realisht po ndodh. Në një moment ajo shkruan:
“Heshtja ime nuk është mungesë përgjigjeje, është një kufi i vendosur mes asaj që duhet thënë dhe asaj që duhet kuptuar.”
Në një tjetër paragraf shton:
“Ajo që po ndodh nuk është thjesht një çështje personale, por një shfaqje e një modeli që po zgjerohet me një normalitet të heshtur.”
Fjalë që duken të ngarkuara me kuptim, por që në thelb nuk tregojnë konkretisht se për çfarë po flet, për kë po flet dhe çfarë po ndodh realisht brenda Partisë Socialiste. Në fund, reagimi i saj mbetet një tekst i gjatë reflektimesh abstrakte, që më shumë shton paqartësinë e Elisës sesa e sqaron atë.
