Gjatë vizitës në Tiranë, kryetari i Komisionit për Punët e Jashtme në Parlamentin Europian, David McAllister, u ndal veçanërisht te roli i opozitës dhe klima politike në vend, duke shprehur shqetësim për nivelin e lartë të polarizimit. Ai theksoi se Shqipëria ka bërë progres në rrugën e integrimit, por nënvizoi se stabiliteti politik dhe dialogu mbeten të domosdoshëm për ecjen përpara të procesit europian.
McAllister kërkoi që shumica dhe opozita të angazhohen më shumë në dialog institucional, duke theksuar se përplasjet politike dhe protestat e dhunshme nuk kanë vend në një demokraci funksionale. Sipas tij, opozita duhet të jetë pjesë e procesit të dialogut dhe debatit politik, ndërsa mazhoranca duhet të krijojë hapësirën e nevojshme për këtë.
Ai bëri të ditur se gjatë vizitës është takuar me një përfaqësi të opozitës, mes tyre Gazment Bardhi, Jorida Tabaku dhe Albana Vokshi, ndërsa nuk pati një takim me kreun e Partisë Demokratike, Sali Berisha.
