Mereme Sela, kandidate për kryetare e Partisë Demokratike, ka denoncuar publikisht procesin zgjedhor në parti, duke e cilësuar atë të manipuluar dhe në kundërshtim me statutin.
Në një deklaratë për shtyp, Sela bën të ditur se do t’i drejtohet Gjykatës së Tiranës për pezullimin e procesit dhe SPAK për hetimin e asaj që e quan një “proces të korruptuar zgjedhor”.
Ajo akuzon Sali Berishën se ka marrë peng Partinë Demokratike dhe se nuk lejon zhvillimin e zgjedhjeve të lira dhe të ndershme. Sipas Selës, ish-kryetari nuk përmbush kriteret e statutit për të kandiduar, pasi ka humbur zgjedhjet e vitit 2025 dhe nuk i lejohet ligjërisht të rikandidojë.
Po ashtu, Sela thekson se Partia Demokratike nuk mund të vijë në pushtet me një lider të shpallur “non grata” në SHBA dhe Mbretërinë e Bashkuar.
Ajo shton se skualifikimi i saj dhe i kandidatëve të tjerë është i padrejtë dhe përbën një goditje ndaj demokracisë brenda partisë, ndërsa njoftimin për këtë vendim thotë se e ka marrë përmes mediave.
Sela paralajmëron se do t’i drejtohet edhe Ambasadës së SHBA-së, asaj britanike dhe misionit të BE-së për të kërkuar mbështetje dhe për të informuar mbi situatën në parti, ndërsa shprehet skeptike për një reagim nga strukturat e PD-së.
