Ish-kandidatja për kryetare të Partisë Demokratike, Mereme Sela, e skualifikuar nga gara me arsyetimin se nuk kishte profil të lartë publik, i është drejtuar Gjykatës së Shkallës së Parë të Juridiksionit të Përgjithshëm në Tiranë me një padi ndaj Partisë Demokratike të Shqipërisë.
Në kërkesën e saj, Sela kundërshton vendimin për përjashtimin nga gara, duke e cilësuar të paarsyetuar dhe në shkelje të parimit të barazisë në konkurrim. Ajo kërkon shpalljen e pavlefshme absolute të këtij vendimi dhe rikthimin në garë.
Po ashtu, paditësja kërkon që të shpallet i pavlefshëm edhe kandidimi i Sali Berishës, duke argumentuar se bie në kundërshtim me statutin e partisë, i cili sipas saj ndalon rikandidimin e kryetarit nëse partia nuk ka fituar zgjedhjet parlamentare.
Në padi theksohet se Partia Demokratike nuk ka rezultuar forcë fituese në zgjedhjet e vitit 2025, çka sipas Selës e bën të pavlefshëm kandidimin e Berishës dhe cenon integritetin e procesit zgjedhor.
Sela kërkon gjithashtu vendosjen e masës së sigurimit të padisë, konkretisht pezullimin e menjëhershëm të procesit zgjedhor për kryetar të PD-së, i parashikuar për datën 23 maj 2026, deri në përfundim të gjykimit.
Sipas saj, ekziston rreziku i një dëmi të pariparueshëm nëse procesi vijon dhe prodhon një drejtues në kundërshtim me statutin e partisë.
