Deputeti Fatmir Mediu ka zhvilluar një seri takimesh në Departamentin e Shtetit dhe në Asamblenë Parlamentare të NATO-s, ku ka marrë përsipër një mision të madh: t’u shpjegojë amerikanëve si duhet të funksionojë NATO dhe si duhet të mbrohet Ballkani.
Në takimet në Uashington, Mediu kërkoi që vendet e aleancës të rrisin shpenzimet e mbrojtjes deri në 5% të PBB-së dhe paralajmëroi për rrezikun e reduktimit të pranisë së KFOR-it në Kosovë. Po ashtu ai ngriti shqetësimin për ndikimin në rritje të Rusisë dhe Kinës në rajon, duke theksuar se SHBA duhet të angazhohen edhe më shumë në Ballkan.
Pra, ndërsa superfuqia globale harton strategjitë e saj të sigurisë, nga Tirana shkon një deputet për t’i dhënë disa këshilla miqësore: më shumë para për mbrojtjen, më shumë Amerikë në Ballkan dhe më shumë vigjilencë ndaj Kinës.
Ironia? Ndërsa në Uashington flet për sigurinë e NATO-s, në Shqipëri Mediu është i pandehur nga SPAK për tragjedinë e Gërdecit, që lidhet pikërisht me kohën kur ai ishte ministër i Mbrojtjes.
Me pak fjalë: një politikan që në vendin e tij duhet të shpjegojë një shpërthim tragjik të depove të armëve, në Uashington jep leksione se si duhet të ruhet siguria globale.
