Kandidati për deputet i Partisë Demokratike, Ilir Alimehmeti, i ftuar në emisionin “Klan News”, ka folur me tone kritike për zhvillimet e fundit brenda PD-së, duke prekur çështje kyçe si reforma zgjedhore, procesi i primareve. Sipas tij, reforma zgjedhore, për të cilën PD ra dakord, nuk ka qenë në favor të votës së lirë dhe përfaqësimit real të qytetarëve.
Ai vuri në dukje edhe një tjetër vendim të gabuar të partisë, emërimin e koordinatorëve të qarqeve bazuar vetëm në kontributin e tyre, duke lënë në hije kriterin e produktivitetit.
“Që para një viti, mbi një vit kemi diskutuar që reforma zgjedhore nuk ishte në favor të votës së lirë dhe nuk ishte në favor të përfaqësimit direkt të njerëzve, që u bë në mënyrë biletarale. Më pas ne kemi diskutuar se si u vendosën koordinatorët e çdo qarku, kontributi është i rëndësishëm kudo, por edhe produktiviteti kemi thënë është i rëndësishëm, pra përfaqësimi dhe produktiviteti sepse në fund fare shkon për disa zgjedhje ku numërohet vota, pra ka një produktivitet që është numërimi i votave”, tha ai.
Ndonëse pranoi që të futej në garën e primreve, Alimehmeti shtoi se procesi nuk u bë sic duhet dhe solli pasoja. Ai nuk la pa përmendur edhe problematikat me forcat aleate, të lidhura me numrin, përfaqësimin dhe vendin e tyre brenda partisë.
“Procesi i primarave do të duhet të ishte ndjekur më saktë, e kemi thënë që në qoftë se bëhen mirë janë një vlerë e shtuar, por nëse nuk bëhen siç duhet do të krijojë pasoja dhe absolutisht që krijoi, të vogla, të mëdha. Gjithmonë ka njerëz të pakënaqur. Nuk dua t’i jap ngjyrim kësaj, por patjetër që problematika pati. Patëm një problematikë tjetër ndoshta me forcat aleate, me numrin e tyre, me përfaqësimin e tyre, me vendin e tyre”, tha ai.
Përkundër vërtetësisë së konstatimeve të tij, ato vijnë disi me vonesë, pasi Partia Demokratike ndodhet aktualisht në mandatin e katërt në opozitë dhe është më e tkurrur se kurrë më parë. Do të kishte qenë më e dobishme që këto kritika të artikuloheshin para zgjedhjeve të 11 majit, në mënyrë që të kishin një efekt real në proceseset që edhe vet alimehmeti ka qenë pjesë e tyre.
Megjithatë, asnjëherë nuk është vonë për një analizë të ndershme dhe të thelluar. Alimehmeti dhe të gjithë ata që ndajnë të njëjtin mendim me të, duhet të tregojnë guximin për të ngritur zërin në forume të brendshme të partisë, gjithmonë nëse lidershipi do t’u krijojë hapësirën për ta bërë këtë.
