Kryetari i Komisionit për Punët e Jashtme në Parlamenti Europian, David McAllister, gjatë një konference për mediat në Tiranë u pyet për çështjen e Belinda Ballukut, e pezulluar nga detyra si zv/kryeministre dhe për të cilën SPAK ka kërkuar arrestimin.
McAllister deklaroi se rasti ka qenë pjesë e diskutimeve gjatë vizitës dhe takimeve të zhvilluara në Shqipëri, por theksoi se nuk është në pozicion për të komentuar një çështje individuale apo për t’u përfshirë në aspektet ligjore të saj. Megjithatë, ai nënvizoi se ekziston edhe një dimension i përgjegjësisë politike që duhet të zgjidhet brenda vetë qeverisë shqiptare.
Ai shtoi se Shqipëria ka ende punë për të bërë në procesin e integrimit europian dhe se çdo zhvillim që prek funksionimin e institucioneve dhe reformën në drejtësi ndiqet me vëmendje nga Bashkimi Europian.
Në të njëjtën linjë u shpreh edhe ambasadori i Bashkimi Europian në Tiranë, Silvio Gonzato, i cili deklaroi se nismat e qeverisë që lidhen me shtetin e së drejtës monitorohen nga afër. “Ne i ndjekim nga afër nismat e qeverisë që kanë lidhje me shtetin ligjor, jo vetëm se jemi në merak për harmonizimin e tyre me atë të BE, por edhe që të mos prekin reformën e drejtësisë. Sa i takon prekjes apo ndikimit që kanë në këtë rast nuk do kisha një koment në këtë rast. Presim që të konsultohemi për këto nisma”, tha Gonzato.
