Kuvendi i Shqipërisë ka mbyllur aplikimet për Komisionerin e ri për Mbrojtjen nga Diskriminimi.
VNA ka mësuar emrat e kandidatëve, ku ndër ta spikat Alfred Balla, ish drejtues i Këshillit të Lartë të Prokurorisë, apo Genta Tafaj, ish drejtuese e vettingut.
Gjithsej në garë janë 7 emra, por sërish është politika që vendos nëse kjo garë do të prodhojë një drejtues të ri për atë institucion. Kjo pasi, është hera e dytë që Kuvendi hap garën për këtë post. Vitin e kaluar, kur gara u hap, ndër të tjerë, kandidoi edhe gjyqtarja kushtetuese, Sonila Bejtja.
Por PD njoftoi nga Kuvendi përmes Gazment Bardhi se ajo ishte tërhequr nga gara, meqë nuk i kishte bërë mirë llogaritë, dhe se i duhej të qëndronte në Gjykatën Kushtetuese deri kur t’i vinte zëvendësuesi.
Kreu i grupit demokrat hodhi poshtë zërat se ishte bërë një “Pazar politik” që gjyqtarja e afërt me opozitën, të merrte postin me mandat 5 vjeçar. Por pavarësisht kësaj, as PS dhe as PD, nuk ju dhanë firma mbështetëse të gjithë kandidatëve të tjerë nga garë, duke e djegur procesin.
Pa ndonjë nxitim të madh, gara u hap prapë me firmë të Jorida Tabakut, por siç duket nga aplikimet e reja, nuk është pjesë e aspirantëve gjyqtarja Bejtja, e cila mban karrigen në Kushtetuese, pasi pasuesi ende nuk i ka ardhur.
Ngelet për t'u parë nëse PS apo PD do të gjejnë një emër nga kjo listë e re për ta votuar me 71 kartonë, apo do ta djegin sërish procesin, deri kur të piqen kushtet që emra të veçantë të jenë gati për të garuar.
Lista e plotë e kandidatëve
1. Alfred Balla
2. Brunilda Menalla
3. Rozeta Ivanova
4. Genta Tafaj
5. Ermonela Xhafaj
6. Brikena Luto
7. Sonila Hysi Ruka
