Një karrige e përmbysur dhe tabela me mbishkrimin “Sheshi u lirua” shënuan fundin simbolik të protestës 108-ditore të lëvizjes Shqipëria Bëhet përballë Kryeministrisë.
Kreu i kësaj lëvizjeje, Adriatik Lapaj, në një intervistë për A2 CNN, deklaroi se protesta nuk është mbyllur, por vetëm është ridimensionuar dhe do të vijojë në forma të tjera.
“Është një ridimensionim. Protesta do të vijojë aty ku ka qenë, por edhe në çdo cep të Shqipërisë, aty ku kanë probleme qytetarët”, u shpreh Lapaj.
Ai e konsideroi të frytshëm qëndrimin për ditë dhe netë të tëra përballë zyrës së kryeministrit Edi Rama, duke theksuar se protesta pati efekt politik.
“Sot është fakt që kur ne e nisëm protestën, Belinda Balluku ishte ministre, ndërsa sot është shkarkuar”, tha ai.
Ndërkohë që opozita vijon të kërkojë rrugë për bashkim, ndasitë mes partive politike mbeten ende të dukshme. I pyetur nëse do të ketë bashkëpunim me forcat e tjera opozitare në zgjedhje, Lapaj u tregua i rezervuar.
“Drejtuesit duhet të dëgjojnë popullin. Shqipëria ka nevojë për një ndryshim të madh. Ne do të marrim vendime shumë të matura. Unë nuk e kam tagrin për ta dhënë këtë përgjigje”, deklaroi ai.
Megjithatë, Lapaj theksoi se për protestat kundër qeverisë duhet një qëndrim i përbashkët i gjithë faktorëve opozitarë, veçanërisht sa i takon qëndrimit ndaj Kodit Zgjedhor.
