Kandidati për Bashkinë e Vlorës, Dionis Sota, i mbështetur nga partitë opozitare, ka folur për formularin e vetëdeklarimit që ka dorëzuar në KQZ, ku ka deklaruar se niveli më i lartë i arsimit të tij është ai i mesëm, ndërsa në dokument ai figuron edhe me dy emra.
Në një intervistë për Report TV, Sota tha se dëshira e tij ka qenë të vazhdonte studimet e larta për drejtësi, por duke qenë se në atë kohë diplomat bliheshin, ai vendosi t’i përkushtohej punës.
“Unë jam rritur në një kohë kur diplomat bliheshin dhe s’kam pranuar t’i futem asaj valle. E nisa shkollën, por e lashë. Kisha dëshirë të vijoja juridikun, por për shkak të punës nuk e bëra. Tani ndjek kurse online”, tha Sota.
Ai shtoi gjithashtu se kandidimi i tij si i pavarur në zgjedhjet e pjesshme lokale të 9 nëntorit ka qenë një vendim personal.
