Ish-kandidati për Bashkinë e Kuçovës, Lefter Maliqi, ka depozituar sot një kërkesë zyrtare pranë Komisionerit Shtetëror të Zgjedhjeve (KSHZ), Ilirjan Celibashi, ku kërkon vijimin e menjëhershëm të procedurës administrative për mandatin e kryetarit aktual të Kuçovës, Kreshnik Hajdari.
Kjo lëvizje e Maliqit vjen pas zbardhjes së vendimit të fundit të Gjykatës së Lartë, i cili konfirmoi se çështja e mandatit të Hajdarit duhet të zgjidhet në rrugë administrative nga KQZ dhe nuk i përket juridiksionit gjyqësor.
Pretendimet kryesore të Maliqit në kërkesën drejtuar KQZ:
Maliqi pretendon se që nga janari i vitit 2024, kur Komisioni i Ankesave dhe Sanksioneve (KAS) ktheu çështjen për rishqyrtim, kanë kaluar plot 2 vite e 4 muaj pa një zgjidhje përfundimtare. Ai e cilëson këtë si një "zvarritje të qëllimshme" me pasoja mbi legjitimitetin e Bashkisë Kuçovë.
Në kërkesë, Maliqi thekson se Hajdari ka fshehur një dënim nga Gjykata Greke dhe ka falsifikuar formularin e dekriminalizimit. Ai shton se për këtë të fundit, Hajdari është shpallur fajtor edhe nga Gjykata e Posaçme (GJKKO) pas kërkesës së SPAK.
Sipas Maliqit, nëse ligji i dekriminalizimit do të ishte zbatuar drejt nga KQZ në nëntor 2023, Hajdari nuk do të duhej të vijonte ushtrimin e mandatit të fituar në zgjedhjet e vitit 2023.
Cenimi i interesit publik: Paditësi argumenton se kjo situatë ka cenuar rëndë interesat e zgjedhësve të Kuçovës dhe parimin e shtetit të së drejtës.
Maliqi i kërkon zyrtarisht KQZ-së të ndërmarrë këto hapa pa vonesë:
Përfshirjen e menjëhershme të çështjes "Hajdari" në kalendarin e punës së KQZ-së.
Caktimin e një seance publike për shqyrtimin e materialit dhe marrjen e një vendimi përfundimtar mbi heqjen ose jo të mandatit.
Njoftimin zyrtar të tij si palë e interesuar për çdo veprim procedural.
"Zvarritja e mëtejshme e kësaj çështjeje cenon jo vetëm parimin e sigurisë juridike, por edhe besimin e publikut në organizimin e zgjedhjeve të lira e të ndershme," përfundon Maliqi në kërkesën e tij drejtuar kreut të KQZ-së.
