Pedagogu i njohur Ndriçim Mehmeti ka denoncuar përmes një statusi në rrjetet sociale atë që ai e cilëson si arrogancë dhe cinizëm të pushtetit, pas një incidenti që, sipas tij, ndodhi në ambientet e Universitetit të Arteve.
Mehmeti rrëfen se ishte nisur me dëshirë për të ndjekur një shfaqje në sallën e Universitetit të Arteve, me ftesë të Mjeshtres së Madhe të Punës, profesoreshës Manjola Nallbani dhe të studentëve të kantos. Por, sipas tij, përvoja artistike u kthye në një episod që ai e përshkruan si simbol të arrogancës institucionale.
Sipas Mehmetit, sapo ishte drejtuar drejt llozhave të sallës — hapësirë që zakonisht përdoret nga pedagogët — një person i veshur me të zeza dhe me kapuç e ndaloi duke i thënë se nuk lejohej të hynte, pasi llozhat duhej të mbeteshin bosh për ardhjen e ministres së Shëndetësisë, Albana Sala.
“Ku shkon zotëri?” – rrëfen Mehmeti se iu drejtua personi në mënyrë urdhëruese. Kur ai u prezantua si pedagog dhe shpjegoi se ishte aty për të ndjekur shfaqjen, përgjigjja, sipas tij, ishte e prerë: llozhat duhej të ishin bosh sepse pritej ministrja.
Pedagogu thotë se nuk reagoi në moment dhe u largua nga salla, por gjatë rrugës u ndal nga dy kolegë të tij. Njëri prej tyre, sipas Mehmetit, i sugjeroi që ta ndiqte shfaqjen nga shkallët e sallës, pasi “dëgjohej mirë edhe aty”.
Ky moment, sipas pedagogut, ishte më i rëndë se vetë ndalimi.
“Arroganca dhe cinizmi qeveritar nuk njohin kufij”, shkruan Mehmeti në reagimin e tij, duke theksuar se është e papranueshme që pedagogët të mos lejohen të hyjnë në institucionin e tyre për shkak të pranisë së një zyrtari të lartë.
Në statusin e tij, ai ironizon edhe situatën në sistemin shëndetësor, duke i drejtuar një mesazh ministres: “Zonja ministre, shijojeni shfaqjen, pasi punët e shëndetësisë i ke fjollë — nga infrastruktura dhe krevatet e viteve ’60 e deri te mungesa e ilaçeve dhe analizave”.
Mehmeti shton se nuk pret ndonjë reagim nga ministrja për këtë episod, duke e cilësuar atë një shembull të një mentaliteti që, sipas tij, është bërë i zakonshëm në raportin mes pushtetit dhe qytetarëve.
Reagimi i pedagogut ka nxitur diskutime në rrjetet sociale, ku shumë komentues e kanë parë episodin si një ilustrim të kulturës së privilegjit dhe distancës që krijohet mes zyrtarëve dhe qytetarëve në hapësirat publike.
