Lëvizja Bashkë ka zhvilluar mëngjesin e kësaj të premteje një protestë para Bashkisë së Durrësit, si reagim ndaj përmbytjeve masive që prej disa ditësh kanë prekur disa zona të qytetit.
Gjatë tubimit, protestuesit kërkuan shpalljen e gjendjes së jashtëzakonshme dhe një hetim të thelluar mbi funksionimin e hidrovorit të dytë, duke e konsideruar atë si një nga shkaqet kryesore të situatës së rëndë të krijuar nga reshjet.
Gjithashtu, u bë thirrje për një investigim të plotë lidhur me rastin e punonjësit të Bashkisë së Durrësit, Astrit Hysenaj, i cili u gjet pa shenja jete ditën e djeshme. Sipas protestuesve, ka dyshime se ai është marrë nga rrjedha e ujit gjatë përmbytjeve, çka kërkon zbardhje të plotë të rrethanave.
Gjatë protestës, pjesëmarrësit mbanin pankarta me mbishkrime si “Gjendje e jashtëzakonshme tani”, “Uji na mbyt, korrupsioni sundon” dhe “Hetim për portin e ri”, duke akuzuar institucionet vendore për neglizhencë dhe mungesë përgjegjësie në menaxhimin e situatës.
