Kryetari i partisë “Shqipëria Bëhet”, Adriatik Lapaj, ka përjashtuar çdo mundësi bashkëpunimi me Partinë Demokratike, si në Parlament, ashtu edhe në zgjedhjet e ardhshme për Bashkinë e Tiranës. Në një intervistë për A2 CNN, Lapaj tha se subjekti politik që ai drejton nuk do të bëjë koalicion me ata që bashkëpunojnë me Edi Ramën.
“Ne jemi një parti në opozitë me sistemin. Kjo do të thotë se në Parlament nuk jemi pjesë e asnjë grupi parlamentar dhe deri tani ky është vendimi i subjektit tonë politik. Do të vazhdojmë vetëm. Bashkëpunim me kë? Me ata që bashkëpunuan me Edi Ramën? Vjet, në korrik, kur ndryshuan Kodin, e bëra unë apo ata?”, u shpreh Lapaj.
I pyetur nëse do të kandidojë për Bashkinë e Tiranës, ai nuk dha një përgjigje të prerë, duke theksuar se vendimi do të merret pas diskutimit me strukturat drejtuese të partisë.
Kujtojmë se të njëjtin qëndrim ka mbajtur edhe kryetari i Lëvizjes “Bashkë”, Arlind Qori, i cili ka refuzuar bashkëpunimin me partitë opozitare për zgjedhjet në Bashkinë e Tiranës.
