Pavarësisht refuzimeve nga partitë e tjera, kreu i Shqipëria Bëhet, Adriatik Lapaj, nuk tëhiqet nga ideja për bashkimin e forcave opozitare kundër qeverisë Rama. Së fundmi, Lapaj ka publikuar 6 pika mbi të cilat duhet të bazohet bashkëpunimi mes tyre.
Partia “Lëvizja Shqipëria Bëhet” vlerëson angazhimin dhe nismën e ndërmarrë nga një grup intelektualësh dhe qytetarësh të angazhuar për Forumin e Dialogut Politik dhe se qëndrimi i Partisë “Lëvizja Shqipëria Bëhet” mbi bashkëpunimin e propozuar nga ky forum, është i kushtëzuar me 6 pika:
1. Krijimi i një komiteti qytetar për qeverinë tranzitore, i cili të ketë objektiv krijimin e një qeverie tranzitore të përbërë nga personalitete të respektuara me mandat të kufizuar 12 mujor dhe kompetenca të përcaktuara qartë, e cila garanton ndarjen e pushtetit nga interesat e partisë-shtet dhe administrimin e ndershëm të procesit zgjedhor.
2. Vendosjen e të gjitha grupeve të interesit në sheshin përballë Kryeministrisë në protestë 24 orë në 24 pa ndalim dhe Organizimin e protestave masive kombëtare me qëllim Dorëheqjen e Edi Ramës.
3. Reformë zgjedhore gjithëpërfshirëse, me lista të hapura, bazuar në sistemin proporcional kombëtar, me lejimin e koalicioneve parazgjedhore, si garanci për përfaqësim real, barazi vote dhe konkurrencë të ndershme politike.
4. Pjesëmarrja në tryezën e dialogut të përfaqësive politike dhe partiake pa kryetarë, për të shmangur personalizimin e procesit dhe për t’i dhënë përparësi përfaqësimit, ideve dhe vullnetit qytetar.
5. Zhvillimin e dialogut në një tryezë të përbashkët në shesh, si simbol i transparencës, hapjes dhe sovranitetit të qytetarëve mbi procesin politik.
6. Pasurimin e grupit negociator me emra të spikatur të shoqërisë civile.
Kujtojmë se Lëvizja Bashkë refuzoi çdo bashkëpunim me partitë e tjera opozitare, pasi sipas tyre çdo thirrje për bashkëpunim i shërben kreut të PD, Sali Berisha. Ndërsa demokratët duket se nuk duan që pjesë e këtij bashkëpunimi të jetë kreu i partisë Mundësia, pasi deputeti i PD, Edi Paloka e akuzoi se Agron Shehaj po luan lojën e Ramës.
