Lëvizja Shqipëria Bëhet ka zhvilluar protestën e radhës përpara Kryeministrisë, ku disa qindra qytetarë iu bashkuan tubimit kundër qeverisë.
Gjatë fjalës së tij, kryetari i Lëvizjes Shqipëria Bëhet, Adriatik Lapaj, deklaroi se qeveria e kryeministrit Edi Rama është në luftë të hapur me qytetarët, duke e akuzuar se ka mbjellë frikë, varfëri dhe drogë në vend. Sipas tij, shteti shqiptar është vënë në shërbim të grupeve kriminale, ndërsa institucionet funksionojnë si zgjatim i tyre.
Lapaj theksoi se nuk ka asnjë shtet normal ku krimi i organizuar dhe droga të kapin pushtetin pa pasoja shkatërruese për shoqërinë. Ai u shpreh se aty ku krimi kthehet në sistem, dominojnë varfëria, korrupsioni dhe keqqeverisja.
“Nuk ka asnjë komb në botë ku droga dhe krimi i organizuar kapin shtetin dhe ai të mbijetojë. Kur krimi kthehet në sistem, varfëria, korrupsioni dhe keqqeverisja bëhen normë, sepse shteti vihet në shërbim të krimit. Droga, qoftë e bardhë apo e kuqe, prodhon vuajtje për kombet dhe ata që i vendosin shtetet në funksion të saj, meritojnë një luftë të madhe dhe një aleancë kombëtare e ndërkombëtare kundër tyre”, deklaroi Lapaj.
Protesta u shoqërua me thirrje kundër qeverisë dhe paralajmërime për vijimin e saj në ditët në vijim.
Kreu i Shqipëria Bëhet, Adriatik Lapaj theksoi se i kanë kërkuar që të heqë dorë nga protesta e përditshme që mban para Kryeministrisë por ai premtoi se nuk do të heqë dorë
