Kreu i lëvizjes “Shqipëria Bëhet”, Adriatik Lapaj, ka refuzuar në mënyrë të prerë ftesën e Sali Berishës për dialog politik, duke theksuar se zgjidhja e krizës nuk vjen nga tryezat mes liderëve, por nga mobilizimi qytetar në shesh.
Në një intervistë për News24, Lapaj deklaroi se protesta kundër qeverisë do të vijojë, pavarësisht ndërhyrjeve të policisë, të cilat ai i cilësoi si të dhunshme dhe të rrezikshme për jetën e protestuesve. Sipas tij, organizatorët kanë respektuar të gjitha procedurat ligjore, duke njoftuar policinë katër ditë më parë për vendin, orën dhe zhvillimin e protestës, por megjithatë forcat e rendit kanë ndërhyrë për të hequr çadrat pa asnjë paralajmërim.
“Erdhën për të hequr çadrat në mënyrë të dhunshme, pa asnjë njoftim. Kishte edhe persona civilë që fotografonin protestuesit. Kampi u hoq dy herë, edhe natën”, tha Lapaj, duke paralajmëruar se do të depozitojë ankesa pranë Agjencisë së Mbikëqyrjes Policore, pasi, sipas tij, sjellja e policisë ka rrezikuar jetën e tij.
Duke iu referuar ftesës së Sali Berishës për dialog, Lapaj u shpreh qartë se nuk e sheh dialogun mes partive si zgjidhje. “Për çfarë na duhen tryezat? Ne na duhen qytetarët në shesh”, theksoi ai, duke shtuar se protestat duhet të jenë përtej logove partiake dhe kontrollit të liderëve politikë.
Si alternativë, Lapaj propozoi krijimin e një komiteti me përfaqësues të shoqërisë civile dhe organizatave të ndryshme, i cili do të ketë selinë në Bulevard dhe do të marrë vendime politike, përfshirë kërkesën për largimin e kryeministrit Edi Rama. “Jam i gatshëm të bëj një hap pas dhe të jem qytetar i thjeshtë, nëse kjo çon në largimin e Ramës”, deklaroi ai.
Sipas Lapajt, thelbi i protestës është ndërgjegjësimi i qytetarëve për zgjedhje të lira dhe të ndershme dhe vendosja e dorëheqjes së kryeministrit në qendër të debatit publik. Ai pranoi se sheshet ende nuk janë plot, por e lidhi këtë me humbjen e shpresës tek qytetarët. “Njerëzit kanë parë si rrugë ikjen”, përfundoi ai.
