Në prag të nisjes së legjislaturës së re, Kuvendi i Shqipërisë pritet të miratojë një riorganizim të strukturës së komisioneve të përhershme parlamentare, duke e rritur numrin e tyre nga 8 në 11.
Ndryshimet nuk përfshijnë vetëm shtimin e komisioneve të reja, por edhe shkrirje dhe ndarje të atyre ekzistuese. Konkretisht, Komisionet për Çështjet Europiane dhe të Politikës së Jashtme do të bashkohen në një të vetëm, i cili do të drejtohet nga mazhoranca, duke i hequr opozitës drejtimin e deritanishëm të Komisionit të Çështjeve Europiane.
Ndryshime do të ketë edhe për Komisionin e Çështjeve Ligjore, Administratën Publike dhe të Drejtat e Njeriut, ku çështjet e të drejtave të njeriut do të trajtohen nga një komision i veçantë, që sipas parashikimeve do të drejtohet nga opozita.
Komisioni i Sigurisë Kombëtare do të ndryshojë emërtim, duke u quajtur Komisioni për Çështjet e Brendshme. Ndërkohë, Komisioni i Veprimtarisë Prodhuese do të shpërbëhet në tre komisione të reja: për Burimet Natyrore, Infrastrukturën dhe Bujqësinë.
Një tjetër risi është krijimi i një komisioni të ri me fokus antikorrupsionin, që në draftin paraprak është emërtuar si Komisioni për Nismat Qytetare.
Me këtë ristrukturim, numri i anëtarëve në çdo komision do të ulet nga 27 në 13. Mazhoranca pritet të marrë drejtimin e 7 komisioneve, ndërsa opozita do të kryesojë 4. Për zbatimin e këtyre ndryshimeve do të nevojitet miratimi i ndryshimeve në Rregulloren e Kuvendit.
