Kuvendi i Shqipërisë ka miratuar në seancën e sotme plenare projektligjin “Për Barazinë Gjinore”, pas një votimi të shoqëruar me debate të forta politike brenda dhe jashtë sallës.
Projektligji u miratua me 77 vota pro, 36 kundër dhe asnjë abstenim, duke shënuar një moment të rëndësishëm në procesin e përmirësimit të kuadrit ligjor që synon garantimin e të drejtave të barabarta mes grave dhe burrave në të gjitha fushat e jetës publike dhe private.
Kërkesa për ta kaluar projektligjin në votim u bë pas deklaratave të kreut të grupit parlamentar të Partisë Socialiste, Taulant Balla, i cili kërkoi që debati të mbyllej dhe Kuvendi të fokusohej në procesin e miratimit të ligjit.
Në seancë, deputetët e mazhorancës theksuan rëndësinë e këtij ligji për përmbushjen e standardeve ndërkombëtare të barazisë gjinore dhe për forcimin e mekanizmave institucionalë që mbrojnë gratë nga diskriminimi dhe dhuna me bazë gjinore.
Ndërkohë, opozita ka kundërshtuar ashpër projektligjin, duke argumentuar se disa prej neneve të tij “cenojnë thelbin tradicional të familjes shqiptare” dhe “hapin rrugën për interpretime të gabuara në fushën e edukimit dhe politikave sociale”.
Jashtë godinës së Kuvendit, gjatë ditës së sotme u mbajtën dy protesta nga Koalicioni Pro Familjes, i cili shprehu kundërshtinë ndaj miratimit të projektligjit dhe kërkoi tërheqjen e tij, duke e cilësuar atë si një nismë që “minon vlerat familjare dhe shoqërore”.
