Kuvendi i Shqipërisë zhvillon sot dy seanca plenare, me një axhendë të ngarkuar dhe debate të pritshme politike. Në qendër të vëmendjes është kërkesa e deputetëve të Partisë Demokratike për shkarkimin e kryetarit të Kuvendit, Niko Peleshi, të cilin opozita e akuzon për shkelje të Kushtetutës dhe të Rregullores së Kuvendit.
Debati për këtë çështje pritet të nisë në orën 10:00 dhe sipas burimeve parlamentare, seanca mund të shoqërohet me diskutime të ashpra mes mazhorancës dhe opozitës. Kjo është hera e parë që një kërkesë e tillë për shkarkimin e kryetarit të Kuvendit futet në rendin e ditës në këtë legjislaturë.
Pas përfundimit të debatit politik, në orën 11:30 pritet të nisë seanca e dytë plenare e ditës, e cila do të fokusohet në raportimet e disa institucioneve të pavarura përpara Kuvendit. E para që do të marrë fjalën është kryetarja e Këshillit të Lartë të Prokurorisë, Mirela Bogdani, e cila nuk arriti të raportojë në seancën e kaluar.
Në vijim, deputetët do të shqyrtojnë raportin vjetor për vitin 2024 të Avokates së Popullit, Erinda Ballanca. Po ashtu, në rendin e ditës janë përfshirë edhe prezantimet e raportimeve nga Komisioneri për Mbikëqyrjen e Shërbimit Civil, Radio Televizioni Shqiptar (RTSH), Autoriteti i Mediave Audiovizive (AMA) dhe Instituti i Statistikave (INSTAT).
Kjo seancë vjen vetëm pak ditë pas asaj të së hënës, ku u prezantuan raportet e institucioneve të drejtësisë dhe u miratua ngritja e Komisioneve të Posaçme për Reformën Zgjedhore dhe Reformën Territoriale.
Rendi i ditës i Kuvendit, datë 30 tetor 2025:
1. Kërkesa e deputetëve të PD për shkarkimin e kryetarit të Kuvendit, Niko Peleshi
2. Raportimi i Këshillit të Lartë të Prokurorisë
3. Raportimi i Avokates së Popullit
4. Raportimi i Komisionerit për Mbikëqyrjen e Shërbimit Civil
5. Raportimi i RTSH
6. Raportimi i AMA
7. Raportimi i INSTAT
