Kreu i Lëvizjes Vetëvendosje, Albin Kurti, ka komentuar në konferencën e sotme për media zhvillimet politike dhe deklaratat e fundit të LDK-së lidhur me 15 nënshkrimet e prezantuara nga kryetari i kësaj partie, Lumir Abdixhiku, si dhe për përmendjen e kandidaturës së Vjosa Osmanit.
Kurti është shprehur se LDK nuk ka sqaruar se për çfarë përfaqësojnë këto 15 nënshkrime, ndërkohë që, sipas tij, po kërkohet garanci për 66 vota në një proces të fshehtë votimi.
“Kryetari i LDK-së nuk tregon se për kë i ka 15 nënshkrime, por kërkon garanci për 66 vota në kuti, në një votim të fshehtë. Pra 15 nënshkrime pa emra, me datë të pardjeshme, ua tregon juve dhe jo mua, dhe kërkon garanci për votat në kuti”, ka deklaruar Kurti.
Sipas tij, një qasje e tillë nuk është as logjike dhe as serioze. Ai ka shtuar se LDK po përmend emra kandidatësh pa marrë më parë vendimet përkatëse brenda strukturave të saj.
“Është totalisht e palogjikshme dhe jo serioze. Kush dëshiron bashkëpunim me ne, duhet të sjellë listën me 15 nënshkrime dhe emrin e kandidatit të LDK-së. Pastaj mund të shtojmë edhe ne 15 nënshkrime dhe të diskutojmë. Nuk mund të përmendet një emër pa vulën e Kryesisë së LDK-së. Le të mblidhet Kryesia dhe të sqarojnë për çfarë janë ato nënshkrime. Unë nuk përcaktoj kandidatin e LDK-së”, është shprehur Kurti.
