Në një Shqipëri që reklamohet si kampione e digjitalizimit dhe "Smart Cities", përplasja në Gjykatën Kushtetuese mes Shoqatës së Gazetarëve (AGSH), BIRN dhe Qeverisë për mbylljen e TikTok-ut, dhuroi dje një skenë që do t’i kishte zili edhe një skeç i "Portokallisë".
Ndërsa botës i prezantojmë ministren Diella, për Inteligjencën Artificiale, përfaqësuesit e qeverisë shqiptare u detyruan të pranojnë në sallën e gjyqit një realitet mesjetar. Kur AGSH kërkoi prova zyrtare se TikTok-u ishte rihapur (pas vendimit të papritur të qeverisë për të tërhequr masën e bllokimit), përgjigja ishte epike:
"Faqja e Fletores Zyrtare ka probleme teknike, ndaj vendimi është botuar me shkrim dore ditën e djeshme."
Në vendin e "e-Albania", ku çdo shërbim supozohet të jetë një klik larg, institucioni kryesor i transparencës ligjore, Qendra e Botimeve Zyrtare (QBZ), dorëzohet para një "error-i" në server. Duket se kur vjen puna për të mbuluar hapat e gabuar ligjorë, qeveria është gati të marrë penën dhe të shkruajë mbi letër, vetëm e vetëm që procesi të duket "i kryer".
Përtej ironisë së një shteti që "nuk i punon asgjë" online, Gjykata Kushtetuese ka dhënë vendim të ndërmjetëm kundër qeverisë: gjykimi vazhdon.
Edhe pse qeveria u mundua ta quante çështjen "të rënë nga fuqia" meqë TikTok-u u rihap "me shkrim dore" një natë më parë, trupa gjykuese refuzoi ta pushonte procesin. Arsyeja? Interesi publik.
Gjyqi po vijon dhe ende nuk është dhënë një vendim final nëse mbyllja e Tik Tok një vit më parë ishte apo jo abuzive.
