Nuk mjaftoi prezantimi i parë nga ministrja Delina Ibrahimaj. Kryeministri Edi Rama zgjodhi një seancë të dytë prezantimi për drejtuesin e ri të inspektoriateve, duke e kthyer momentin në një mesazh politik dhe administrativ mbi rëndësinë që qeveria i jep reformës në këtë sektor. Në aktivitet ishte i pranishëm edhe ish-deputeti i PD-së, Dashnor Sula, i cili sipas Ramës përfaqëson një figurë me eksperiencë politike dhe juridike që mund të kontribuojë në fazën e re të reformës.
Kryeministri e përshkroi këtë etapë si një moment kyç, pas një periudhe parapërgatitore që, sipas tij, është fokusuar në studimin e modeleve dhe krijimin e bindjes se skema e vjetër organizative duhet të kapërcehej. Tani, theksoi ai, reforma hyn në fazën e zbatimit të thelluar, që do të shoqërohet edhe me ndërtimin e një kompleksi të ri për inspektoriatet, me synim përqendrimin dhe modernizimin e tyre në një strukturë të vetme.
Në fjalën e tij, Rama nënvizoi se ndryshimi i njerëzve nuk është i mjaftueshëm nëse sistemi nuk është i organizuar si duhet dhe nëse drejtimi nuk është i qartë. Ai vuri theksin tek profesionalizimi, duke përmendur nevojën për bashkëpunim me universitetet, trajnime të vazhdueshme dhe një sistem bonusesh financiare për të stimuluar performancën e inspektorëve.
