Në politikën shqiptare rrallë ndodhin surpriza, por në Fier ndodhi një prej tyre: këshilltarët e PS dhe PD bashkuan votat për të zgjedhur kryetarin e ri të Këshillit Bashkiak.
Me 41 këshilltarë të pranishëm në sallë, këshilli votoi për Melsi Bogdanin si kryetar të ri. Procesi u hap pasi grupi socialist paraqiti një mocion për shkarkimin e kryetares në detyrë, Antoneta Çunaj, duke i kërkuar dorëheqjen.
Çunaj shmangu një votim për shkarkimin duke paraqitur dorëheqjen e parevokueshme, ndërsa bëri të ditur se do të vijojë të mbetet pjesë e këshillit si këshilltare. Ajo gjithashtu kundërshtoi zhvillimin e një votimi të fshehtë për zgjedhjen e pasardhësit.
Pas verifikimit të kërkesës nga Komisioni i Mandateve, u zhvillua votimi për kreun e ri të këshillit. Bogdani u zgjodh me shumicë kartonash, duke marrë jo vetëm votat e socialistëve, por edhe mbështetjen e këshilltarëve të PD-së. Kundër votoi vetëm ish-kryetarja Çunaj.
Në fjalën e tij pas zgjedhjes, Bogdani vlerësoi punën e paraardhëses dhe tha se Këshilli Bashkiak i Fierit do të hyjë në një fazë të re funksionimi.
Por ajo që mbetet më e pazakontë në këtë histori është fakti se mazhoranca dhe opozita lokale votuan në një linjë, duke krijuar një shumicë të përbashkët për drejtimin e këshillit.
