Elisa Spiropali duket se ka zbuluar së fundmi një problem të madh në politikën shqiptare: krizën e Parlamentit. Në një reagim në Facebook, ish-ministrja e Jashtme është shfaqur e bezdisur nga seanca e fundit parlamentare, ku debati degradoi në fyerje dhe përplasje, madje edhe mes zonjave deputete.
“Kriza e Parlamentit është kriza e Republikës Parlamentare”, shkruan Spiropali në statusin e saj, duke argumentuar se institucioni që duhet të përfaqësojë qytetarët dhe të kontrollojë qeverinë po shndërrohet gjithnjë e më shumë në një arenë konfliktesh që nuk prodhojnë politikë.
Sipas saj, problemi nuk është vetë konflikti – i cili ka qenë gjithmonë pjesë e politikës – por fakti që konflikti banal po zëvendëson funksionin e Parlamentit. Ajo paralajmëron se kur Parlamenti nuk arrin të ushtrojë rolin e tij përfaqësues dhe kontrollues, pasoja e parë është rënia e besimit publik dhe dobësimi i vetë Republikës Parlamentare.
Por kjo panoramë e përplasjeve dhe tensioneve në Kuvend nuk është diçka e re. Përkundrazi, është një realitet që ndodh prej kohësh, madje edhe në periudhën kur vetë Spiropali drejtonte Kuvendin dhe nuk i kursente debatet e ashpra me opozitën, veçanërisht me Sali Berishën.
Në këtë kuptim, reagimi i saj duket si një reflektim i vonuar për një krizë që politika shqiptare e ka ndërtuar vetë ndër vite – shpesh edhe me kontributin e atyre që sot shfaqen të shqetësuar për të.
