Kryeministri Edi Rama ka vijuar mbrojtjen e tij ndaj masës pezullim nga detyra të zëvëndëskryeminsitres Belinda Balluku. Reagimi vjen pas pranimit të padisë së Qeverisë në Kushtetuese. Në një postim në X, Rama shkruan se pezullimi ishte një veprim i paprecedent në botën demokratike.
Ai nënvizon se askund në një shtet demokratik një gjykatës i shkallës së parë nuk ka ndërmarrë masa të tilla ndaj një anëtari të qeverisë, ndërsa theksoi se një qasje e tillë përbën cenim të parimeve kushtetuese dhe ndërhyrje në ekuilibrat e pushteteve.
“Fjalët e shumta janë fukarallëk, gjeni një rast të dytë në botë ku një prokuror dhe një gjykatës – për më tepër i shkallës së parë – pezullojnë një anëtar qeverie! Të thuash se kjo qenka normale, kur s’është parë askund, është njësoj si të thuash se drejtësia është normale vetëm në Shqipëri”, u shpreh Rama.
Ndër të tjera thotë se mbështet fuqimisht Reformën në Drejtësi, por e cilësoi këtë vendimmarrje si një “rrëzim fëmijëror” të sistemit të ri të drejtësisë, që sipas tij nuk prek vetëm institucionin që e merr vendimin, por gjithë funksionimin e qeverisjes.
Postimi
Fjalët e shumta janë fukarallëk, gjeni një rast të dytë në botë ku një prokuror dhe një gjykatës - për më tepër edhe i shkallës së parë fare - pezullojnë nga detyra një anëtar qeverie!
Se të më thoni që kjo qenka kaq normale, paçka se s’është parë kurrë, askund, në botën demokratike, është njësoj si të më thoni se drejtësia qenka normale vetëm në Shqipëri!
E pra, pavarësisht se nga dita 1 kam qenë, jam e do të jem mbështetësi më i paepur i Reformës dhe Pavarësisë së Drejtësisë, këtë risi botërore të drejtësisë sonë të re, unë nuk e quaj dot asgjë tjetër përveçse një nga ato rrëzimet e fëmijës kur sapo ka mësuar të eci. Me ndryshimin që kur fëmija i vërtetë rrëzohet, lëndon vetëm vetveten, ndërsa kur drejtësia rrëshqet kështu si këtë herë, cënon parimet kushtetuese, prish balancën mes pushteteve të pavarura dhe ndërhyn brutalisht në procesin qeverisës.
Le të jemi të qartë:
Qëllimi i lartë i luftës kundër korrupsionit nuk e justifikon përdorimin e asnjë mjeti të gabuar dhe historia e vendeve që kanë kaluar më parë nga kjo rrugë e domosdoshme, na mëson se justifikimi i mjeteve të gabuara për hir të qëllimit madhor, e kthen kurën me mjete të tilla, në një të keqe edhe më të madhe se sa vetë sëmundja që thuhet se këto mjete po kurojnë. Ky mësim nuk duhet harruar kurrësesi. Nga askush.
