Në PS nuk ka autoritarizëm, por ka imponim – kështu deklaroi sot Erion Braçe në TCH, pas një serie të gjatë deklaratash ku foli për problemet e PS dhe ambicien e tij për të kandiduar për Bashkinë e Tiranës.
As mish as peshk, edhe jemi mirë por dhe kemi probleme, socialisti i vjetër nuk arriti dot të artikulonte qartë problemet e vërteta me të cilat përballet PS. Pakënaqësitë e Erion Braçes, të artikuluara në mënyrë sipërfaqësore, nuk arritën dot t’i shkonin në thelb problemit: autoritarizmit të Edi Ramës dhe mënyrës si e drejton ai PS. Këtë deputeti i PS nuk e tha në asnjë moment qartësisht.
Se i druhet Ramës, se i duhet Rama për kandidimin, kjo mbetet për t’u parë. Por një figurë e vjetër në një parti politike si PS ndoshta duhet të artikulohet qartë dhe të mos fshihet pas fjalisë: “mendoj se brenda PS ka liri”.
Nëse ka liri, atëherë Erion Braçe nuk ka pse të shkojë të qajë hallet e partisë te Grida, por të gjejë një mënyrë brenda partisë.
Përndryshe këto kritika konstruktive për një parti që ka veç një emër, atë të Edi Ramës, janë tym për të bërë diferencën mes atyre që i binden Ramës në mënyrë të heshtur dhe atyre që i binden duke dhënë ndonjë intervistë. Dhe Erion Braçe i përket kategorisë së fundit.
