Sipas dokumenteve të siguruara nga VNA, Komisioni Qendror i Zgjedhjeve (KQZ) ka nisur zyrtarisht procedurat e verifikimit të integritetit për anëtarët e rinj të Kabinetit Qeveritar. Përmes një shkrese zyrtare të datës 10 mars 2026, Komisioneri Shtetëror i Zgjedhjeve, Ilirjan Celibashi, i ka kërkuar Ministrit të ri të Infrastrukturës dhe Energjisë, z. Enea Karakaçi, dorëzimin e Formularit të Vetëdeklarimit.
Kjo kërkesë vjen në zbatim të "Ligjit të Dekriminalizimit" i cili synon garantimin e integritetit të personave që ushtrojnë funksione të larta publike.
Në shkresën drejtuar z. Karakaçi, KQZ sqaron se funksioni i ministrit është subjekt i këtij ligji, veçanërisht për ata anëtarë të Këshillit të Ministrave që nuk kanë mandat deputeti dhe nuk e kanë dorëzuar më parë këtë formular.
Afati: Ministri ka 10 ditë kohë nga marrja e njoftimit për të dorëzuar formularin në KQZ.
VNA mëson se një shkresë e ngjashme i është dërguar edhe Ministrit të ri të Mbrojtjes, z. Ermal Nufi, duke reflektuar një valë verifikimesh për emërimet e reja në ekzekutiv.
Hija e hetimeve të SPAK mbi Karakaçin
Përtej procedurës standarde të KQZ-së, emri i Enea Karakaçit nuk është i panjohur për organet e drejtësisë. Karakaçi ka qenë subjekt i kontrolleve nga Prokuroria e Posaçme (SPAK).
Këto kontrolle lidhen me pozicionet e tij të mëparshme në sektorin e energjisë, ku hetuesit e SPAK kanë kërkuar dokumentacion dhe kanë kryer verifikime mbi procedurat e ndjekura në këtë dikaster. Edhe pse aktualisht ai mban postin e Ministrit të Infrastrukturës dhe Energjisë, dorëzimi i formularit të vetëdeklarimit do të jetë një "test" tjetër ligjor, ku ai duhet të deklarojë çdo përballje me drejtësinë, brenda apo jashtë vendit.
