Komisioni i Reformës Zgjedhore është mbledhur këtë të premte, duke vijuar procesin e dialogut mes mazhorancës dhe opozitës.
Në tryezë morën pjesë ekspertët e propozuar nga palët:
Nga PS – Viktor Gumi, Elena Xhina, Dardan Malaj.
Nga PD – Altin Kazizaj, Muharrem Çakaj, Arjan Madhi.
Mbledhja vjen një ditë pasi opozita iu bashkua edhe Komisionit të Reformës Territoriale, duke sinjalizuar një klimë më të qetë bashkëpunimi pas përplasjeve politike të kohëve të fundit.
Bashkëkryetari i komisionit, Damian Gjiknuri, theksoi se objektivi është prodhimi i rregullave sa më funksionale për procesin zgjedhor:
“Produkti i këtij komisioni duhet të jenë rregulla sa më të mira për ata që aspirojnë pushtet”.
Ndërsa bashkëkryetari nga opozita, Oerd Bylykbashi, u shpreh:
“Me rëndësi është puna dhe ekspertiza e ekspertëve. Konsultimet duhet të kthehen në produkt të punës. Na duhet me patjetër ekspertiza e OSBE dhe BE. Pushtimi i shtetit në zgjedhje është problem madhor. Vota e diasporës mbetet një sfidë kolosale”.
Ndërsa Fatmir Mediu shtoi:
“Uroj të mos përsëritet ajo që ka ndodhur në reformat e shkuara, ku nuk janë përmbushur rekomandimet e OSBE-ODIHR”.
