Kolegji Zgjedhor vendosi të shfuqizojë një vendim të Komisionerit Shtetëror të Zgjedhjeve dhe ta urdhërojë atë që të regjistrojë shtetasin Gjergji Nika, si kandidat i pavarur për Kryetar Bashkie, i propozuar nga zgjedhësit, për Bashkinë e Vlorës.
KQZ dhe KAS e përjashtuan Nikën nga gara për zgjedhjet e pjesshme vendore të 9 nëntorit 2025. Ai vuri në lëvizje Kolegjin Zgjedhor dhe unanimisht pesë gjyqtarët vendosën ti japin të drejtën e regjistrimit si kandidat për Bashkinë e Vlorës. Pas vendimit Nika shkroi në fb se drejtësia fitoi mbi presionet politike.
“Sot, Kolegji Zgjedhor me vendim unanim 5–0 rrëzoi vendimet e KQZ-së dhe KAS-it, duke vulosur të drejtën time për të garuar si kandidat i pavarur në zgjedhjet e 9 Nëntorit 2025 për Bashkinë Vlorë. Ky vendim vjen pas presioneve të shumta dhe përpjekjeve të hapura nga partitë e mëdha për të penguar një zë të pavarur në garë. Por drejtësia foli qartë: askush nuk mund të ndalojë vullnetin e lirë të qytetarëve”, shkroi ai në FB.
