Anëtarët socialistë të Këshillit Bashkiak të Tiranës janë thirrur të mblidhen më 17 shtator, në orën 17:00, në selinë e Partisë Socialiste, për një mbledhje të posaçme të grupit të këshilltarëve. Edhe pse nuk është shpallur axhenda zyrtare, pritet që diskutimi kryesor të fokusohet tek vendimi i Këshillit Bashkiak për shkarkimin e kryetarit të Bashkisë, Erion Veliaj.
Vendimi, i cili shihet si një mekanizëm politik për të hapur rrugën e zgjedhjeve të reja, pritet të sfidohet në Gjykatën Kushtetuese, pasi Veliaj ndodhet ende në paraburgim dhe nuk ka asnjë vendim të formës së prerë ndaj tij. Avokatët e tij ndërkombëtarë paralajmërojnë ankimin dhe ngritjen e çështjes në Strasburg, duke e cilësuar shkarkimin si një akt që cenon integritetin e procesit.
Pa pritur ende shkarkimin formal të Veliajt, kryeministri Edi Rama shpalli kandidaturën e Ogerta Manastirliut për Bashkinë e Tiranës. Ky vendim pritet të ndezë shkëndijën e parë të përplasjes zyrtare dhe publike mes Ramës dhe Erion Veliajt, dikur i konsideruar si numri dy i Partisë Socialiste. Shpallja e kandisaturës së Manastirliut jo vetëm që sinjalizon një mbyllje të përhershme të karrierës politike të Veliajt në PS, por edhe paralajmëron një betejë të re mes kryetarit në detyrë dhe mëtonjësit të tij për kreun e PS shumicës socialiste për kontrollin e kryeqytetit.
