Deputeti i Partisë Demokratike, Belind Këlliçi, komentoi praninë e Ervin Salianjit dhe Ilir Alimehmetit në aktivitetet e PD-së, duke theksuar se kjo është një situatë krejtësisht normale dhe në përputhje me dinamiken e brendshme të partisë.
“Edhe dje më pyetën çfarë mendimi kisha që Salianji dhe Alimehmeti ishin në foltoren e PD-së. Çfarë mendimi mund të kem për një anëtar të Kryesisë së PD-së dhe një anëtar të Këshillit Kombëtar që marrin pjesë në aktivitetin e partisë së tyre? Është krejt normale,” u shpreh ai.
Këlliçi tha se në PD, ndryshe nga Partia Socialiste, mendimi ndryshe dhe debati janë të natyrshëm, duke shtuar se prezenca e tyre nuk përbën shqetësim.
“Kur ka debat apo mendim ndryshe në PD, nuk shqetësohem. Do të shqetësohesha po të ishin të gjithë në rresht për një, si ushtarë — si në PS,” tha ai.
Duke e krahasuar situatën me atë të mazhorancës, Këlliçi vuri në dukje se edhe deputeti socialist Erion Braçe shpesh shpreh kritika ndaj kolegëve të vet, “por për mendimin ndryshe në PS nuk bëhen emisione”.
I pyetur nëse lëvizjet e fundit kanë kosto për opozitën, Këlliçi u përgjigj se qytetarët janë të interesuar për çështje konkrete që prekin jetën e tyre, jo për debatet e brendshme të partive.
“Qytetarët shqetësohen për rritjen e çmimeve dhe të taksave. Ka më shumë vlerë të flasim për këto probleme dhe për atë që mendon ndryshe PD-ja. Kemi kaluar katër vite duke folur për zhvillimet në PD. Të vazhdojmë prapë? Ky kapitull është mbyllur,” deklaroi ai.
Këlliçi theksoi se opozita duhet të fokusohet te çështjet që prekin xhepin e qytetarëve, duke e konsideruar këtë si prioritetin e vërtetë të debatit publik.
