Deputeti i PD, Belind Këlliçi, ka vijuar denoncimet lidhur me procedurat e licencimit të “Jet Bank”, duke i kërkuar zyrtarisht Bankës së Shqipërisë sqarime mbi integritetin e procesit.
Nga foltorja e Kuvendit, ia bëri të ditur se i ka dërguar një shkresë Guvernatorit të Bankës së Shqipërisë, Gent Sejko, Këlliçi ngre shqetësime për mungesë transparence, duke theksuar se kjo është hera e tretë që i drejtohet institucionit pa marrë, sipas tij, një përgjigje të plotë dhe shteruese.
Sipas dokumenteve të publikuara nga deputeti, struktura aksionare dhe drejtimi i “Jet Bank” kanë kaluar disa ndryshime brenda një periudhe të shkurtër kohore, përpara dhe pas marrjes së miratimit paraprak për licencim nga Banka e Shqipërisë në dhjetor 2025.
Këlliçi sjell në vëmendje se banka është regjistruar fillimisht në korrik 2025, me aksioner të vetëm shtetasin izraelit Idan Avishai, ndërsa më pas, në janar 2026, aksionet janë transferuar 100% te kompania Jet Holdings B.V., e regjistruar në Holandë.
Në shkresën e tij, deputeti i PD ngre një sërë pyetjesh drejtuar Bankës së Shqipërisë, përfshirë momentin e aplikimit për licencim, identifikimin e aksionerëve në atë fazë, si dhe kohën kur institucioni është informuar për ndryshimet në strukturën e pronësisë.
Ai kërkon gjithashtu sqarime mbi verifikimet e kryera për anëtarë të këshillit drejtues, përfshirë shtetasin Oliver Hemmer, për të cilin pretendohet se ka pasur lidhje me kompani të përfshira në çështje të dyshuara mashtrimi ndërkombëtar.
Në vijim, Këlliçi ngre pyetje mbi përputhshmërinë e procesit të licencimit me kuadrin ligjor vendas dhe atë europian, duke marrë në konsideratë edhe procesin e integrimit të Shqipërisë në Bashkimin Europian dhe vlerësimet ndërkombëtare në fushën e pastrimit të parave (MONEYVAL).
Deputeti kërkoi gjithashtu sqarime nëse institucionet europiane janë vënë në dijeni për këtë rast dhe nëse procedura e ndjekur mund të ndikojë në vlerësimet e ardhshme të Shqipërisë në procesin e negociatave.
Në përfundim të shkresës, Këlliçi i kërkon Bankës së Shqipërisë të kryejë verifikime të thelluara dhe të bëjë transparencë publike mbi procesin e licencimit dhe kontrollin e ushtruar ndaj aksionerëve dhe palëve të lidhura me ta.
