Detaje të reja janë bërë publike pas përfundimit të mbledhjes së grupit parlamentar të PS. VNA mëson se përplasja mes kryeministrit Edi Rama dhe Elisa Spiropalit ka qenë shumë më e fortë nga sa u raportua fillimisht.
Sipas burimeve, gjatë debatit Spiropali i është drejtuar Ramës me pyetjen: “Ke autoritet të më përjashtosh?”. Kryeministri i është përgjigjur: “Ti po e shkakton vetë.”
Pas kësaj, dy politikanët janë afruar dhe kanë debatuar fytyrë më fytyrë në një moment tensioni që ka tërhequr vëmendjen e të gjithë deputetëve të pranishëm në sallë.
Burimet bëjnë me dije se në fund të mbledhjes Spiropali ka kërkuar ujë, por për disa momente askush nuk i ka ofruar. Më pas ajo i ka kërkuar ujë deputetit Tërmet Peçi, i cili i ka dhënë shishen e tij.
Tensioni është reflektuar edhe gjatë drekës që ka pasuar mbledhjen. Sipas të njëjtave burime, Spiropali është lënë vetëm në tavolinë, ndërsa vetëm Holta Xhaçka ka shkëmbyer disa fjalë me të.
Ndërkohë në krahun tjetër, Belinda Balluku është parë duke mbledhur rreth 20 deputetë në tavolinën e saj, një veprim që nga disa është interpretuar si një sinjal politik brenda grupit parlamentar.
Ngjarja ka shtuar edhe më shumë zërat për tensione dhe pakënaqësi brenda Partisë Socialiste, ndërsa mbetet për t’u parë nëse kjo përplasje do të sjellë pasoja të mëtejshme në raportet brenda grupit parlamentar.
