Gjyqtarja Suela Xhani është përzgjedhur me short për të shqyrtuar padinë e depozituar nga Mereme Sela ku kundërshton përjashtimin e saj nga gara për drejtimin e partisë. Sela pretendon se skualifikimi është bërë me një vendim të paarsyetuar, të pamotivuar dhe në mungesë të transparencës procedurale, duke e cilësuar atë si shkelje të drejtpërdrejtë të të drejtave statutore dhe të parimit të barazisë në konkurrim.
Në padi thuhet gjithashtu se organet e partisë kanë lejuar kandidimin e Sali Berisha në kundërshtim me statutin e partisë. Sipas pretendimeve të Selës, neni 46 i statutit, i njohur ndryshe si “neni Basha”, parashikon që kryetari që humb zgjedhjet duhet të largohet nga drejtimi i partisë.
Në kërkesën drejtuar gjykatës, Mereme Sela kërkon:
Shpalljen e pavlefshme absolute të vendimit për skualifikimin e saj nga gara për kryetar të PD-së;
Detyrimin e palës së paditur për rikthimin e saj në garë;
Shpalljen e pavlefshme absolute të kandidimit të Sali Berishës;
Konstatimin e shkeljeve të rënda të statutit dhe parimeve të demokracisë së brendshme;
Vendosjen e masës së sigurimit të padisë, duke kërkuar pezullimin e menjëhershëm të procesit zgjedhor të 23 majit 2026 deri në përfundimin e gjykimit.
