Në një dalje me dritë të kuruar, me video të montuara estetikisht dhe me ton alarmi kombëtar, deputetja e Partisë Demokratike, Jorida Tabaku, bëri zbulimin që tronditi themelet e ekonomisë shqiptare: çmimet janë rritur.
Pas 13 vitesh qeverisje të Edi Ramës, opozita duket se ka zbuluar se frutat, perimet dhe produktet e fshatit nuk janë më aq të përballueshme sa dikur. Sipas Tabakut, shporta është bërë luks dhe tryeza e pensionistëve po boshatiset për shkak të braktisjes së bujqësisë dhe mungesës së politikave mbështetëse për fermerët.
“Rritja e çmimeve në mënyrë të pakontrolluar i ka kthyer ato në produkte të ndaluara për shumë familje shqiptare,” theksoi ajo, duke lidhur situatën drejtpërdrejt me taksat e larta, zhvlerësimin e euros dhe mungesën e subvencioneve reale për një sektor që përbën rreth 16% të PBB-së.
Sipas saj, produktet shqiptare po prodhohen gjithnjë e më pak, ndërsa fermerët janë lënë të mbijetojnë mes kostove të rritura dhe një tregu që favorizon importin.
Ironia qëndron jo te fakti që çmimet janë të larta — kjo është e prekshme në çdo treg e supermarket — por te momenti i “zbulimit”. Në vitin e 13-të të pushtetit socialist, kur kriza e çmimeve ka vite që është bërë pjesë e përditshmërisë, alarmi opozitar vjen i paketuar me filtra, ndriçim profesional dhe hashtag-e sensibilizuese.
Ndërkohë, qytetarët vazhdojnë të bëjnë llogaritë para raftit të qumështit dhe tek tezga e domateve, pa luksin e videove me dritë perfekte. Dhe ndoshta presin më kot që partia e Joridës të vijë në pushtet që të ulë çmimet.
