Asociacioni i Gazetarëve të Shqipërisë ka reaguar ndaj sjelljes së ministrit të Qeverisë Rama, Ervin Demo, gjatë një interviste me gazetaren Luela Gaxhja nga emisioni investigativ Piranjat.
Gjatë bisedës, ish-kryebashkiaku i Beratit iu përgjigj pyetjeve të gazetares me komentin: “Je shumë simpatike”, duke shkaktuar reagime të menjëhershme në rrjete dhe në media.
Drejtuesit e Piranjave e cilësuan këtë deklaratë si sjellje të papërshtatshme për një përfaqësues qeverie dhe ngritën pyetje mbi normalizimin e seksizmit në komunikimin publik.
Në reagimin e sotëm, AGSH thekson se një ministër duhet të tregojë respekt institucional dhe etik ndaj përfaqësuesve të medias.
“Një ministër i qeverisë shqiptare duhet të jetë shembull i respektit institucional dhe etik ndaj përfaqësuesve të medias, jo autor i sjelljeve që minojnë dinjitetin e gazetareve vajza,” – thuhet në deklaratën e asociacionit.
AGSH kërkon që ministri Demo të kërkojë ndjesë publike për sjelljen e tij, të cilën e konsideron të papranueshme dhe në kundërshtim me etikën që duhet të karakterizojë marrëdhënien midis institucioneve dhe mediave.
Reagimi i plotë i, Asociacionit të Gazetarëve të Shqipërisë
Në lidhje me komentet seksiste të ministrit të Pushtetit Vendor Ervin Demo ndaj gazetares Luela Gaxhja
Asociacioni i Gazetarëve të Shqipërisë (AGSH) dënon qëndrimin e papërshtatshëm të ministrit të Pushtetit Vendor, z. Ervin Demo, ndaj gazetares së emisionit investigativ “Piranjat”, Luela Gaxhja, të cilës gjatë një pyetje për një çështje me interes publik ai iu drejtua me fjalët: “Je shumë simpatike”.
Ky koment, përbën një sjellje të papranueshme seksiste, e cila tenton të zhvendosë vëmendjen nga pyetja profesionale e gazetares dhe ta reduktojë rolin e saj në terren. Një ministër i qeverisë shqiptare duhet të jetë shembull i respektit institucional dhe etik ndaj përfaqësuesve të medias, jo autor i sjelljeve që minojnë dinjitetin e gazetareve vajza.
AGSH rikujton se çdo formë e trajtimit, seksist apo poshtërues ndaj gazetareve, është në kundërshtim me standartet etikë, standardet e Këshillit të Europës dhe angazhimet e Shqipërisë për barazi gjinore dhe lirinë e medias.
Ne i bëjmë thirrje Ministrit Demo që të kërkojë ndjesë publike ndaj gazetares Luela Gaxhja dhe të reflektojë mbi gjuhën dhe sjelljen e tij në raport me mediat. Gjithashtu, u bëjmë thirrje institucioneve shtetërore që të respektojnë rolin e gazetarëve si kontrollues të pushtetit dhe garant të transparencës.
