Ndryshe nga Gazment Bardhi, i cili u mbështet te rregullorja e Kuvendit për të justifikuar mungesën e PD në votimin e rezolutës për Iranin, Ivi Kaso ka qenë më i drejtpërdrejtë në qëndrimin e tij.
Në një intervistë për Euronews Albania, Kaso tha se rezoluta nuk është hartuar sipas nevojave të politikës së jashtme të vendit dhe se mënyra si po sillet për miratim është problematike. Sipas tij, nëse Shqipëria do të dilte si vendi i dytë në botë që merr një pozicion të tillë për Iranin pas SHBA-ve, kjo do të meritonte një debat serioz dhe një procedurë të rregullt parlamentare.
Ai e cilësoi nismën si një “tekë të Edi Ramës për të dalë si suportues i SHBA-ve”, duke theksuar se rezoluta nuk është depozituar si nismë e qeverisë dhe as nuk është diskutuar më parë në Kuvend. Për këtë arsye, sipas tij, opozita nuk do të marrë pjesë në një seancë që është thirrur pa një rend dite të qartë.
