Vajza e presidentit amerikan Donald Trump ka mbërritur dje në Shqipëri në një vizitë të përqendruar kryesisht në Vlorë dhe investimet e parashikuara atje. Ivanka Trump, një personazh i njohur në politikën ndërkombëtare, së bashku me bashkëshortin e saj ka qenë disa herë më parë në Shqipëri, por këtë herë vizita e saj është rrethuar me më shumë zhurmë dhe mister, edhe për shkak të dinamikës politike në vend.
Ftesa e presidentit Trump për kryeministrin Rama, si drejtues i ekzekutivit shqiptar, për “Bordin e Paqes”, si edhe akuzat e opozitës se Ivanka Trump ndodhet në Shqipëri për një vizitë thjesht private, janë bërë boshti kryesor i lajmeve të 24 orëve të fundit.
Mbrëmë në Vlorë, Ivanka Trump u pa edhe në shoqërinë e kryeministrit Edi Rama, ndërsa ajo që nuk ra shumë në sy ishte makina me të cilën ajo udhëtoi. Një BMW me targa diplomatike të Ambasadës Amerikane, 23 01B, e ka shoqëruar Ivanka Trump gjatë gjithë vizitës së saj në Shqipëri.
VNA mësoi se kjo është makina që përdor ambasadori i SHBA-së në Shqipëri, çka ngre një pyetje thelbësore: a është kjo një vizitë thjesht private? A mundet që Ambasada e SHBA-së të vërë në dispozicion makinën e numrit një të institucionit për një udhëtim privat?
Është e vështirë të thuhet se ditët e kaluara në Shqipëri, kryesisht në Vlorë, nga ana e Ivanka Trump janë pjesë e një vizite krejtësisht private. Protokolli i shoqërimit të saj përmban elemente shtetërore, të cilat, pa hyrë në detaje apo konspiracione, janë të dukshme dhe të interpretueshme.
Ajo që mbetet fakt është se Ivanka Trump po viziton Shqipërinë si pjesë e një protokolli ku Ambasada e SHBA-së është e përfshirë seriozisht në sigurinë dhe protokollin zyrtar të saj.
