Ish-kreu i PD-së në Durrës, Osman Stafa, dhe një nga studentët e dhjetorit 1990, gjatë pjesëmarrjes në aktivitetin përkujtimor në nderim të Azem Hajdarit, theksoi domosdoshmërinë e pastrimit të Partisë Demokratike.
Në fjalën e tij, Stafa përdori një metaforë të fortë për të ilustruar nevojën për ndryshim brenda forcës politike. Ai tha se PD ka nevojë për mirëkuptim me njëri-tjetrin, për tolerancë dhe për të qenë më të vendosur.
“Ne disa faza i kemi kaluar, por jo çdo fazë e tij ka treguar që e pjek burrin. Ne kemi nevojë për më shumë mirëkuptim me njëri-tjetrin, për tolerancë dhe për të qenë më të vendosur. E fundit që do të sugjeroja, ka një parim, nëse një pjesëtar familjeje në darkë lëviz dhe kthehet në mëngjes, ai nuk është më pjesë e familjes. Unë atë pjesëtar të familjes e pastroj. Ne kemi nevojë të pastrohemi, doktor Berisha, ne duhet të jemi vetvetja, shqiptarët shpresojnë dhe besojnë tek ne”, u shpreh Stafa.
