Ish-ministrja socialiste Ermelinda Meksi e cila është shkëputur prej vitesh nga Shqipëria dhe punon e jeton e pavarur në Vienë, ka bërë një rrëfim që i çjerr maskën Edi Ramës dhe ftesës së tij me dorë të shtrirë, për të kthyer diasporën të vijë të investojë në vend.
Ajo tregon historinë e saj dhe të birit, ekspert në teknologji dhe mbrojtje kibernetike.
Meksi tregon se pasi Shqipëria u sulmua, i biri, dhe kompania e tij ndërkombëtare u shkruan institucioneve shqiptare për të ofruar ndihmë, por nuk morën asnjë përgjigje, as edhe refuzuese.
“Kur shpërtheu skandali i AKSHI-t, u bë e qartë se heshtja nuk kishte qenë rastësi. Kur më pas mësuam për shifra të mëdha investimesh, u kuptua edhe më qartë arsyeja e mungesës së përgjigjes. Si mund të dyfishohen projektet nga 2 në 4 milionë? Si mund të operojë një kompani serioze në një sistem ku ryshfeti bëhet pjesë e lojës? Dhe në fund arrin në përfundimin e dhimbshëm: “Më mirë që nuk mora përgjigje, sesa të përfshihesha në atë realitet.””,-shkruan ish ministrja Meksi.
Ajo ngre pyetjen se për çfarë ja vlejti konkretisht Samiti i Diasporës?
“Shumë të rinj sot me gjithë dëshirën për të kontribuar, përballen me mungesë dëgjimi, mungesë meritokracie dhe një sistem që më shumë se aftësinë favorizon lidhjet klienteliste. Dëshira për të kontribuar ekziston dhe është e sinqertë. Ajo që kërkohet është një qasje më e hapur, më e përgjegjshme dhe e bazuar në meritë, në mënyrë që këto energji dhe kapacitete të mos mbeten të pashfrytëzuara. Vetëm kështu samitet mund të kthehen në besim dhe kontribut konkret për vendin; ndryshe, rrezikojnë të mbeten thjesht fasadë”,-shton Ermelinda Meksi.
Ajo përfundon duke thënë se historia e të birit, është vetëm një ilustrim, mes qindra historish të të rinjve në diasporë.
