Ish-kreu i PD-së, Lulzim Basha, mbërriti në SPAK për të dhënë shpjegime si person në dijeni lidhur me demonstratën e dhunshme të 21 janarit 2011, gjatë së cilës u vranë.
Basha ka qenë ministër i Brendshëm në kohën kur ndodhi ngjarja e rëndë, e cila nuk u zbardh asnjëherë plotësisht. SPAK vendosi fillimisht të mos fillojë procedimin penal mbi bazën e kallëzimit të të vejës së Aleks Nikës. Por Gjykata e Lartë, pasi shqyrtoi çështjen, vendosi ta urdhërojë Prokurorinë e Posaçme të hetojë rastin. Strasburgu ndërkohë e ka konsideruar 21 janarin si krim shtetëror.
Para godinës së Kryeministrisë u vranë Hekuran Deda, Ziver Veizi, Faik Myrtaj dhe Aleks Nika. Për vrasjen e Myrtajt dhe Veizit janë dënuar me dënime të lehta ish-kreu i Gardës së Republikës, Ndrea Prendi, dhe ish-gardisti Agim Llupo.
Vrasjet e Nikës dhe Dedës vijojnë të mbeten pa autor. SPAK po heton rolin e zyrtarëve të lartë dhe se kush dha urdhrin të qëllohej mbi protestuesit më 21 janar.
