Anëtari i Kryesisë së Partisë Demokratike, Indrit Hoxha, ka deklaruar se shpenzimet për Kuvendin e “Rithemelimit” të mbajtur më 11 dhjetor 2021 janë shumë herë më të ulëta sesa shifrat e publikuara në media. Megjithatë edhe pse mbante mend shpenzimet për çdo foltore i ftuar në emisionin “Real Story”, Hoxha nuk kujtohej sa kushtoi kuvendi kombëtar i dhjetorit duke argumentuar se ai është pjesë e sekretit hetimor.
Sipas tij, të gjitha shpenzimet e Kuvendit janë kryer me fatura dhe dokumentacion përkatës, të cilat i janë vënë në dispozicion Prokurorisë së Posaçme. “Prokuroria i ka të gjitha pagesat dhe të gjitha faturat. Është çështje e sekretit hetimor dhe nuk mund të flas për këtë pjesë, por ju them se shifra është qindra herë më e vogël se sa shumat që fliten nëpër media”, u shpreh Hoxha.
Ai theksoi gjithashtu se hetimi i SPAK për këtë çështje mund të jetë iniciuar edhe nga denoncimet e Gazment Bardhit, i cili në atë periudhë ishte në krah të Lulzim Bashës dhe kundër Sali Berishës, në kohën kur ky i fundit po zhvillonte betejën për marrjen e vulës së Partisë Demokratike.
Gjatë bisedës, anëtari i Kryesisë së PD bëri edhe një përllogaritje të përgjithshme të aktiviteteve politike të zhvilluara në atë periudhë, duke theksuar se 27 Foltoret e Sali Berishës kanë kushtuar rreth 3–4 mijë euro pasi sallat nëpër bashki janë dhënë pa shpërblim nga kryetarët pavarësisht se ishin në opozitë.
