Rreth 5000 persona që ndodhen në burgje apo paraburgim pritet të kenë të drejtën e votës në zgjedhjet e ardhshme vendore. Vota e tyre është kthyer sërish në debat, pas precedentit të vitit 2023 në Rrogozhinë, kur rezultati i zgjedhjeve u anulua nga Kolegji Zgjedhor me argumentin se qelia është vendqëndrim dhe jo vendbanim për efekt zgjedhor.
Pikërisht për këtë çështje u zhvilluan sot debate në Komisionin Rregullator të KQZ, ku u shqyrtua projekt-vendimi për krijimin e qendrave të posaçme të votimit në institucionet e vuajtjes së dënimit.
Partia Demokratike kishte njoftuar paraprakisht kundërshtimin e plotë ndaj këtij akti. Në një email drejtuar Komisionit Rregullator përmes përfaqësuesit Franc Nuri, PD argumentonte se vendimi i Kolegjit Zgjedhor për Rrogozhinën e ka përcaktuar qartë se burgu është vendqëndrim dhe jo vendbanim dhe se KQZ nuk mund të ndryshojë këtë interpretim përmes akteve nënligjore.
Megjithatë, pavarësisht kundërshtimeve dhe debateve, akti u miratua me 4 vota. Tre anëtarëve të propozuar nga mazhoranca iu bashkua edhe përfaqësuesi i PD në KQZ, Arben Ristani, ndërsa anëtarja tjetër e opozitës, Helga Vukaj, votoi kundër.
Në këtë mënyrë, kryekomisioneri Ilirian Celibashi dhe Arben Ristani u gjendën në të njëjtën anë të votës për të miratuar rregullat që lejojnë të burgosurit të votojnë për bashkinë ku ndodhet burgu, pra aty ku kanë qelinë, pavarësisht se në cilën bashki janë të regjistruar si votues në gjendje të lirë.
Vendimi pritet të rikthejë sërish çështjen në Kolegjin Zgjedhor, i cili do të duhet të vendosë nëse do t’i qëndrojë interpretimit të vitit 2023 apo do të marrë në konsideratë ndryshimet e fundit ligjore që e trajtojnë qelinë si vendbanim për efekt të gjendjes civile.
