Në gjykatën e Posaçme u zhvillua këtë të enjte seanca paraprake për shqyrtimin e akuzave ndaj ish-presidentit Ilir Meta, ish-bashkëshortes së tij Monika Kryemadhi dhe 3 të pandehurve të tjerë.
Teksa bëri mbrojtjen para gjykatës, Ilir Meta thumboi nga kafazi prej xhami kryeministrin Edi Rama.
“Kam qenë shtetar. Nuk kam abuzuar kurrë me detyrën. Kam bërë jetën të thjeshtë. Nuk kam pirë verë 33 mijë euro dhe nuk kam udhëtuar me çarter”, tha Meta.
Ka qenë ish-zëvendëskryeministri në arrati Arben Ahmetaj që ka akuzuar Edi Ramën se pi verë 33 mijë euro, detaj që theksua nga Meta në sallën e gjyqit. Gjykata pasi dëgjoi pretendimet e palëve vendosi ta shtyjë për të mërkurën e ardhshme vendimin për kalimin ose jo për gjykim të dosjes penale ndaj të pandehurve.
Ndërkohë, Gjykata e Lartë rrëzoi rekursin e ish-presidentit që kërkonte shfuqizimin e masës së arrestit në burg, çka do të thotë se Ilir Meta do të vijojë të qëndrojë në qeli.
